Vikudagur á Akureyri og neikvætt viðhorf til "utanbæjarmanna" (sem ekki vilja sameinast Akureyri)

Virðulegt - en frekar lítið - staðarblað heitir Vikudagur og er gefið út á Akureyri.    Það var lengi vel skrifað af Hjörleifi Hallgríms sem var ritstjóri og eigandi.  Hjörleifur var þekktur fyrir sérkennilega einstrengingslegar "lókal-áherslur" - þar sem "utanbæjarmenn" - og aðrir "óverðugir" voru tortryggðir meira en góðu hófi gengdi að mínu mati og líklega margra annarra (utanbæjarmanna).

Nýir eigendur og ritstjóri og blaðamenn hafa haldið á blaðinu í nokkuð marga mánuði - - en hafa líklega átt eitthvað erfitt með að auk útbreiðslu blaðsins og skapa því nægan trúverðugleika.

Nú les ég í skætingshorni blaðsins enn og aftur viðhorf sem er dálítið "Hjörleifskt" - m.a. gagnvart íbúum í Hörgárbyggð - sem lítinn áhuga hafa á að sameinast Akureyri.    Og enn er ská-skotið á Grímseyinga - (líka  í fréttaskrifum) - vegna þess að þeir óska viðræðna um möguleika á sameiningu.

Líka er Mývetningum send skítapilla - sem lætur að því liggja að þeir séu fjandsamlegir nágrönnum sínum - af því að þeir gáfu skýrt til kynna að þeim hugnaðist ekki sú sameining sveitarfélaga sem lagt var upp með gangvart Þingeyjarsveit og Aðaldælahreppi.  

Spyrja má hvort sameiningartillagan í Þingeyjarsýslunni hafi ekki lent í því að afvegaleiðast með illa grunduðum hugmyndum um lokun skóla - og takmörkun á þjónustu - sem tiltekin orðræða í aðdraganda kosninga virðist hafa framkallað.  Einnig kann að hafa komið fram - undir yfirborði - að það væri of langt milli Fnjóskadals og Reykjahlíðar til að mönnum gæti litist á lítt útfærðar hugmyndir um "hagræðingu" - án þess að fram hefði farið tilraun til að leggja upp heildstæða skipulagshugmynd fyrir nýtt og landfræðilega víðfeðmt sveitarfélag. 

--------- 

Ég velti því fyrir mér hvort það geti verið að þessi vinkill sem Vikudagur reisir  - í hálfkæringi sennilega - þó öllu gamni fylgi . . .. . -  geti dregið úr möguleikum þess á því að verða tekið alvarlega.   Það sem svolítið hangir nefnilega á spýtunni er skortur á umræðuvirðingu - um fólk sem ekki er sömu skoðunar og "ímyndaður meirihlutavilji" - þeirra sem rita skæting í þessum dúr.   

Menn verða að viðurkenna að sameining sveitarfélaga hefur alls ekki gengið vel alls staðar þar sem hún hefur þó verði samþykkt.   Það hefur borið við að tilteknir minnihlutahópar hafa verið straujaðir - og gengið harkalega gegn sjónarmiður og hagsmunum - þeirra sem hafa orðið undir - - þó notaðar hafi verið röksemdir "hagræðingar" - með lokun skóla og allsherjar skerðingu á þjónustu.   Vandamál sumra ýkist með sameiningu - þar sem rekstrarvandi á smærri skala - hjá minni sveitarfélögum hefur sums staðar einungis illviðráðanlegur með sameiningu.    Tekjustofnar sveitarfélaga eru einfaldlega ekki skilgreindir þannig að það verði til traustar rekstrarforsendur fyrir þeim verkefnum sem löggjafinn  - með samstarfi við ráðandi sveitarfélög - staðsetur hjá nærsamfélögunum.

--------

Eitt vandamál í þessu efni - sem er séríslenskt - er það að vera með einungis tvö stjórnsýslustig ;- sveitarfélagastigið og ríkisrekstrarstigið.    Öll nágrannalönd okkar beggja vegna Atlantshafsins nota 3 eða fjögur stjórnsýslustig - og auk þess sjálfstæða stofnanastjórnsýslu - þar sem sjálfstæðir skólar og heilbrigðisstofnanir, frjálsir skólar og sjálfseignarstofnanir leika mikilvægt hlutverk.   Ekkert af þessu er tilfellið hélendis  - heldur er streðað með tvö stig og virðingarverðir sveitarstjórnarmenn skrökva því jafnvel í greinilegu áróðursskyni að sveitarfélögin á hinum Norðurlöndunum ráðstafi 70% af skatttekjum þeirra landa.   það er að vísu rétt að ríkissjóðir hinna Norðurlandanna ráðstafa rétt rúmum 30% skattteknanna - - en sveitarstjórnarstigið í þeim löndum fer ekki með neitt teljandi hærra hlutfall.  Sjálfstæð stjórnsýsla - hérðaðsstjórnir og ömt/fylke - og sjálfseignarstofnanir og frjálsar stofnanir - halda á stærstu sneiðinni.  Ekki það að slíkt leysi endilega öll vandamál.    Það er að mínu mati grafalvarlegt að verða vitni að því að sveitarstjórnarmenn skuli bera á borð þau ósannindi að sveitarfélög í Danmörku Svíþjóð og Noregi haldi á ráðstöfun allt að 70% skatttekna þeirra landa - - og ég bara botna ekkert í því að hafa orðið vitni að því að jafnvandaður maður og Lúðvík Geirsson í Hafnarfirði þrástagist á slíkri vitleysu - - á vettvangi Samfylkingarinnar.

--------

Vangavelturnar mína hér að ofan spruttu vegna þess sem ég held að sé okkur á Akureyri fjötur um fót - og m.a. grafi undan trúverðugleika miðla eins og Vikudags; - það er sjálflægni og drýldni og neikvæðni í garð "utanbæjarmanna"  og meira og minna leiðindatónn í garð allra þeirra sem hafa sjónarmið sem málpípurnar álíta minnihlutajónarmið.    Hér þurfum við að laga til - sýna meira umburðarlyndi og innleiða tiltekna umræðuvirðingu - um leið og við göngum á hólm við heimóttarlega og fordómafulla orðræðu þeirra sem ráðast gegn öllum sem eru nýir, koma utanað - að Sunnan - frá útlöndum eða úr Hörgárbyggð eða úr Þingeyjarsýslunni.     Allir utanbæjarmenn, útlendingar, háskólamenntað fólk að sunnan og jafnvel Þingeyingar - eiga auðvitað skilið að fá tækifæri til að láta til sín taka - - jafnvel þó menn gangi hvorki til liðs við KA né Þór.    Menn eru ekki óvinveittir þó þeir standi fyrir önnur sjónarmið - heldur en "málpípurnar" - - eða þeir sem sitja með sjálfum sér á kaffihúsum bæjarins og "sproksetja" flesta  þá sem eitthvað reyna til gagns og framfara.

Athugasemdir

[Birgir Guðmundsson (IP-tala skráð) 23.11.2007 kl. 13:41]

Ástæða er til að þakka kærlega fyrir þessa ádrepu/hugleiðingu, sem að mestu snýst um sameiningu sveitarfélaga. Bensi er hvass eins og fyrridaginn og sem einn útgáfustjórnarmanna blaðsins verkjar mig aðeins undan stungunum. Ég held þó að menn verði að fara varlega í að fullyrða of mikið um blaðið út frá því sem kann að raðast saman í eitt tiltekið tölublað og sérstaklega ber að taka "passlega" alvarlega það sem skrafað er um á götuhorninu. Benedikt segir að eftirfarndi hái m.a. Vikudegi  "... það er sjálflægni og drýldni og neikvæðni í garð "utanbæjarmanna"  og meira og minna leiðindatónn í garð allra þeirra sem hafa sjónarmið sem málpípurnar álíta minnihlutajónarmið."

 Það vil ég segja að undan þessum ummælum  svíður sérstklega vegna þess að við sem stöndum að blaðinu höfum einmitt talið að við værum að vinna gegn þessum smámennskusjónarmiðum og almennt með nokkuð góðum árangri.    Þessi sjónarmið kunna hins vegar að vera bæði fréttnæm og mikilvægur hluti af umræðunni hér á Akureyri og nágrenni, og í því samhengi hljóta þau að finna sér leið inn í blaðið sem umfjöllunarefni bæði í pistlum, slúðri og fréttum. Því segi ég að ádrepa Benedikts, verður að sjálfsögðu skoðuð á Vikudegi og yfir hana farið, en mér sýnist hann þó hafa verið svo grimmur við okkur að það jaðri við ósanngirni. En við Vikudagsmenn kveinkum okkur ekki og þökkum fyrir að fá að heyra það sem menn eru að huga, annars bíður okkar fullkomin stöðnun! 

Með bestu kveðjum,

Birgir Guðmundsson, í útgáfustjórn Vikudags

[Benedikt Sigurðarson, 23.11.2007 kl. 16:09]

Blessaður Birgir og takk fyrir að svara.

Átti það auðvitað ekkert endilega skilið - þar sem ég  var "hvass - eða næstum því ósanngjarn" - og var að nota þann sjálflægasta af öllum sjálflægum miðlum; - blogg á Mogga.

Hélt einmitt að það væri áhugamál hjá mörgum núverandi aðstandendum Vikudags að vinna gegn "smámennskusjónarmiðunum" - og nú hef ég það staðfest amk. frá þér.   Í því vildi ég gjarna að við værum bandamenn.   En við þurfum að fá fleiri í það liðið

[Ingólfur Ásgeir Jóhannesson, 25.11.2007 kl. 14:31]

Ætla ekki að gerast dómari í því hvort Bensi stakk of skarpt því að ég las ekki nefndan Vikudag.

Er aftur á móti gáttaður á því hversu mörgum sameiningarkosningum þykir boðlegt að henda á sama fólkið á cirka tveggja ára fresti. Vitanlega var það allt önnur tegund sameiningar að Mývatnssveit sameinaðist Dölunum (spurning hvort heimabyggð okkar, Bensi, ætti ekki að sameinast Dölunum í Dalasýslu, t.d. vegna þess að þangað voru sóttir skoskir hundar þegar við vorum að verða fullorðnir  ) en þegar tvívegis voru greidd atkvæði um stóra sameiningu alla leið norður til Raufarhafnar - en Mývetningar felldu. Ég hef heyrt mjög sterkt í Þingeyjarsveit það sjónarmið að "klára" sameiningu hennar áður en sameinast er fleirum.

[Helgi Már Barðason, 25.11.2007 kl. 17:18]

Þið Mývetningar gætu gert margt vitlausara en sameinast Dalamönnum, því að þar býr sómafólk!